#የሦስት_ምርጫዎች_ወግ፡ ቁ1

አብዛኞቻችን (አንዳንድ የኢህአዴግ ደጋፊዎችን ጨምሮ) ተቃዋሚ ፓርቲዎች ፓርላማ እንዲገቡ የምንፈልገው ለምንድነው? “በተወካዮች ምክር ቤት ከፍተኛ ድምፅ ኖሯቸው አዲስ ህግ እንዲያረቁ ነው?”…አይደለም! መንግስት ከፈለገ ማታ ህግ አርቅቆ ጠዋት በፓርላማ ሊያፀድቅ እንደሚችል በስዬ አብረሃ ህግ አሳይቶናል (በከፍተኛ የሙስና ወንጀል የተከሰሱ ግለሰቦችን የዋስትና መብት እንዳይኖራቸው የሚያትተው የህግ አንቀፅ በፓርላማ የፀደቀበት…)

…”መንግስት በሚያቀርባቸው የዉሳኔ ሃሳቦች ላይ ድጋፍ በመንፈግ ውድቅ እንዲያደርጉ ነው?” አይደለም! ልክ የምክር ቤቱ አፈ-ጉባኤ “ለረቂቅ ሰነዱ ድጋፍ…” ሲሉ ከእንቅልፋቸው የሚነቁና በደመ-ነፍስ እጃቸውን የሚያወጡ የምክር ቤት አባላት ባሉበት በተቃዋሚዎች ጩኸት የሚለወጥ የውሳኔ ሃሳብ ሊኖር አይችልም።

“የህግ አስፈፃሚውና ተርጓሚውን ተግባር እንዲቆጣጠሩልን ነው?”…አይደለም! የትኛው ሚኒስትር፣ የትኛው ዳኛ፣ የትኛው ፖሊስ…ኧረ የቱ የመንግስት መስሪያ ቤት ነው የህዝብ ተወካዮችን ከቁብ ቆጥሮ ሥራና አሰራሩን ያሻሽለው? እስኪ አፈ-ጉባኤ አባ-ዱላ ገመዳ “በከፍተኛ የትምህርት ተቋማት ውስጥ የተንሰራፋው ቅጥ-ያጣ ሙስና በአስቸኳይ እንዲወገድ” ጥብቅ ማሳሰቢያ ሲሰጡ ትንሽ ደንገጥ ያለ የዩንቨርሲቲ ፕሬዘዳንት አጋጥሟችሁ ያውቃል። የፍርድ ቤት ዳኛ ሆነ ፖሊስ የሚታዘዙት፣ የሚፈሩት… በህገ-መንግስቱ የበላይ አካል የሆኑትን የህዝብ ተወካዮች ነው ወይስ ተራ የመንግስት ባለስልጣንን?

የተቃዋሚ ፓርቲ አባላት ፓርላማ እንዲገቡ አጥብቀን የምንሻው በሕገ-መንግስቱ የተጣለባቸውን ሃላፊነት በአግባቡ ይወጣሉ በማለት ነው? አይደለም! ከዚያ ይልቅ፣ የመንግስትን ስህተትና ትክክለኝነት የሚያሳዩ “መስታዎት” ሆነው ስለሚያገለግሉ ነው።

እንደ ሀገር የህዝቡን ሃሳብ፣ ብሶትና ጥያቄ የሚስተናገዱበት ነፃ የሆነ ሚድያ የለን፣ ወይ በቅጡ የተደራጁ የሞያና የሲቪል ማህበራት የሉን፣ ወይ ገዢው ፓርቲ በራሱ የሃሳብ ልዩነቶችን የሚያስተናግድ አይደለ፣….ለዚህ ተግባር በህግ የተቋቋሙት እንደ የህዝብ እምባ-ጠባቂ፣ የኢትዮጲያ ሰብዓዊ መብት ኮሚሽን፣ የሥነ-ምግባርና ፀረ-ሙስና ኮሚሽን፣ … ያሉትም ቢሆኑ የተደራጀ አቅም እና ከመንግስት አካላት ተፅዕኖ ነፃ ሆነው አገልግሎታቸውን ለህዝብ ተደራሽ አያደርጉም። በእንዲህ ያለ ሁኔታ የተቃዋሚ ፓርቲ አባላት ትክክለኛውን የህዝብ ስሜት ለመንግስት አካላት ስለሚያደርሱ ነው።

በተለይ ደግሞ፣ ልክ እንደ አቢሿም ግለሰብ በስሜት ለሚነዳው የእኛ ሀገር መንግስት፣ ብዙ ሺህ ዶላር ከሚከፈላቸው አማካሪዎች፣ ከምንትስ ዩኒቨርሲቲ በዶላር ማስተርስና ዶክትሬት ድግሪ ከሸመቱ ሌባ አማካሪዎች የተሻለ መካሪዎች፣ ስህተትን የሚጠቁሙ ስለሆነ ነው። በተለይ እንደነ አብይ ተክለማሪያም፣ ታምራት ነገራ ያሉ ሌሎች የግል ጋዜጠኞችን ከሀገር አሳዶ ካባረረ በኋላ ተቃዋሚዋች በህዝብና መንግስት መካከል ያሉ ብቸኛ ድልድይ ናቸው።

በአጠቃላይ፣ የፌደራል ፖሊስና ደህንነት ፀረ-ሽብር ግብረ-ሃይል፣ የፍርድ ቤት ቀጠሮ እየጠየቀ ወንጀል ከሚፈበርክ አቃቤ-ህግ፣ በሙስና ከሚውጠው በላይ የጎረሰ የፍርድ ቤት ዳጃ፣ …በነፃነት የመኖር፣ የማሰብ እና የመናገር መብትህ በእነሱ ፍቃድ የተገኘ የሚመስላቸው የሰፈር ካድሬዎች፣…. የተቃዋሚ ፓርቲ አባላት በእነዚህ የጨቋኝ ስረዓት ጡንቻዎች ሳይደቆሱ፣ የህዝብን ጥያቄ ለመንግስት የሚያደርሱ ብቸኛ ወኪሎች ናቸው።

አሁን “ምርጫውን 100% አሸነፍኩ…“ እያለ የሚለፍፈው ኢህአዴግ “ያያት ወንድ ሁሉ በአድናቆት ፈገግታ ታጅቦ “ቆንጆ…ውብ ፅጌረዳ” እለ ሲያቆለጳጵሳት  ከቤቷ ያለውን ብቸኛ የፊት መስታዎት እንደሰበረች ቀበጥባጣ ኮረዳ አይነት ሆኖብኛል። ኮረዳዋ ከተወሰነ ግዜ በኋላ በጠወለገ ውበቷ የለበጣ ሳቅ ሲስቅቧት እሷ ግን በደስታ የምትስቅ፣ ባገጠጠው ፈገግታዋ ሲሳለቁ፣ መልሳ የምታገጥ፣ …. በመጨረሻም ሁሉም ሲሰለቿትና ሲያገሏት አስቀያሚነቷን እንደምትረዳ አይነት ኮረዳ…….

አሁን በ100% የሚያስጨፍረው የምርጫ ውጤት ኢህአዴግ’ ስህተቱን ከውድቀቱ እንዲማር ከማድረግ ሌላ ፋይዳ የለውም።

አሸነፍኩ ባይ 100 ፐርሰንት
ነቃሽ-ነቃፊ፣ ተቃዋሚ በሌለበት
ስህተቱን ያውቃል ወድቆ አይቶት።   

Ethio-think-thank

Advertisements

ምላሽ ይስጡ

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s