የትግራይ ህዘብ አማራጭ ህወሓት ወይም ባርነት ነው!

በዚህ ፅሁፍ የቀድሞ የኢትዮጵያ መረጃ መረብ እና ደህንነት ኤጀንሲ ዳይሬክተር ሜጀር ጀነራል፣ ዶክተር ተክለ ብርሃን ወልደ አረጋይ ከድመፀ ወያነ ራድዮ ጋር ባደረጉትን ቃለ ምልልስ ዋቢ በማድረግ በህወሓትና የትግራይ ሕዝብ መካከል ያለውን ቁርኝት እንመለከታለን። በዚህ መሰረት የህወሓት የፖለቲካ አይዲዮሎጂ ምን ያህል ፀረ-ዴሞክራሲ እና ፀረ-ህዝብ እንደሆነ በዝርዝር እንዳስሳለን።

የቀድሞ የኢትዮጵያ መረጃ መረብ እና ደህንነት ኤጀንሲ ዳይሬክተር ሜጀር ጀነራል፣ ዶክተር ተክለ ብርሃን ወልደ አረጋይ

1) የትግራይ ሕዝብ እና የህወሓት አንድነት

የቀድሞው የኢትዮጵያ መረጃ መረብ እና ደህንነት ኤጀንሲ ዳይሬክተር ሜጀር ጀነራል፣ ዶክተር ተክለ ብርሃን ወልደ አረጋይ ከድመፀ ወያነ ራድዮ ጋር ባደረጉት ቃለ ምልልስ እንዲህ ብለዋል፡-

“ህወሓት ማለት እንደሌላው ፓርቲ በሰላማዊ መንገድ እታገላለሁ ገለመሌ ብሎ ፕሮግራም ነድፎ የመጣ ፓርቲ አይደለም። በትግራይ ህዝብ ደምና መስዋት የተገነባ ድርጅት ነው። ህወሓት የትግራይ ህዝብ ነው። የትግራይ ህዝብ ማለት ህወሓት ማለት ነው። ሊወሰድ የሚገባው አንደኛው ግንዛቤ ይህ ነው። ህወሓትና የትግራይ ህዝብ ለያይቶ ማየት አይቻለም። …ስለዚህ ህወሓት የሚያጠፋው ጥፋት ቢኖር የራሱ የትግራይ ህዝብ ጥፋት ነው።

በእርግጥ ከላይ በተጠቀሰው ቃለ ምልልስ ሜጀር ጀነራል፣ ዶክተር ተክለ ብርሃን ወልደ አረጋይ የህወሓት አባል አለመሆናቸውን ገልፀዋል። ይሁን እንጂ፣ ዶክተር ተክለ ብርሃን ወልደ አረጋይ ትግራዋይ ናቸው። በመሆኑም ግለሰቡ የትግራይ ተወላጅ፣ የትግራይ ሕዝብ አካል ናቸው። እንደ እንደሳቸው አገላለፅ፣ “ህወሓት የትግራይ ህዝብ፣ የትግራይ ህዝብ ደግሞ ህወሓት” ስለሆነ፣ ዶክተር ተክለ ብርሃን ወልደ አረጋይ ህወሓት ናቸው።

በድጋሜ “ህወሓት የሚያጠፋው ጥፋት ቢኖር የራሱ የትግራይ ህዝብ ጥፋት” ስለሆነ ዶክተር ተክለ ብርሃን ወልደ አረጋይ በቡድን ሆነ በግል የፈፀሙት ጥፋት የትግራይ ሕዝብ ጥፋት ነው። ከዚህ በተጨማሪ፣ “ህወሓትና የትግራይ ህዝብን ለያይቶ ማየት ስለማይቻል” ከላይ የተጠቀሰዉ የዶክተር ተክለ ብርሃን ወልደ አረጋይ አስተያየት እንደ በአጠቃላይ የትግራይ ሕዝብ፣ እንደ ፓርቲ ደግሞ የህወሓት የጋራ አቋምና አመለካከት ነው። ስለዚህ በህወሓት የመጣን ሽልማት ሆነ ቅጣት የትግራይ ሕዝብ መቀበል አለበት። ምክንያቱም እንደ ዶክተር ተክለ ብርሃን ወልደ አረጋይ አገላለፅ፣ ህወሓት ማለት የትግራይ ሕዝብ ስልጣኔ ነፀብራቅ ነው፡-

“ህወሓት ማለት የትግራይ ህዝብ በብዙ ሺህ የስልጣኔው ዘመናት ግስጋሴው በአንደኛው ዘመን በፈጠረው ፖለቲካዊ ፍልስፍና ንቃተ ህሊናው በፈጠረው መደራጀቱ የትግራይ ህዝብ የፈጠረው የስልጣኔው ነፀብራቅ ነው። ህወሓት ማለት የስልጣኔያችን ፖለቲካዊ ታሪካችን አንዱና ረጅሙ ክስተት ነው።”

2) ለህወሓት “አንድነት” ማለት ልዩነትን ማጥፋት ነው!

የህወሓት የፖለቲካ አይዲዮሎጂ ራሱን ከትግራይ ሕዝብ ጋር አንድና ተመሳሳይ በማድረግ ላይ የተመሰረተ እንደሆነ ተመልክተናል። በዚህ መልኩ ህዝብና ፓርቲን አንድ የማድረጉ መሰረታዊ ፋይዳ በማህብረሰቡ ውስጥ ምንም ዓይነት የተለየ ነገር እንዳይኖር ማድረግ ነው። በህወሓት የፖለቲካ አይዲዮሎጂ መሰረት ማንኛውም ዓይነት ልዩነት የችግር መንስዔ ነው። ስለዚህ ህወሓት ራሱን ከሕዝቡ ጋር አንድና ተመሳሳይ ከማድረግ አልፎ በፓርቲውም ሆነ ሕዝቡ ውስጥ ምንም ዓይነት ልዩነት እንዳይኖር አበክሮ ይሰራል። ምክንያቱም ልዩነትን ማስወገድ የችግሮች ሁሉ መፍትሄ ነው።

በህወሓት ውስጥ የተለየ ሃሳብና አመለካከት ያላቸው የድርጅቱ አመራሮችና አበላት መጨረሻቸው ሞት፥ ስደት ወይም እስራት ነው። በዚህ ረገድ እንደ ሙሴ፥ አረጋዊ በርሄ (ዶ/ር)፣ ስዬ አብርሃ፥ ገብሩ አስራት እና የመሳሰሉትን የድርጅቱን ነባር አመራሮች እንደ ማሳያ መጥቀስ ይቻላል። ህወሓት በራሱ ቀርቶ በሚሊዮን የሚቆጠር ህዝብ ውስጥ እንኳን የተለየ ነገር እንዲኖር አይሻም። በትግራይ ሕዝብ ውስጥ ምንም ዓይነት የባህል ሆነ የቋንቋ ልዩነት እንዲኖር አይፈቅድም። ሌላው ቀርቶ የትግሪኛ ቋንቋ አነጋገር ዘየ መለያየት በራያና ወልቃይት አከባቢ ለተነሳው የማንነት ጥያቄና ከዚያ ጋር ተያይዞ ለተፈጠረው የፖለቲካ ችግር መንስዔ ነው። ይህንን ሜጀር ጀነራል፣ ዶክተር ተክለ ብርሃን ወልደ አረጋይ እንደሚከተለው ይገልፁታል፡-

“አንድነታችን የሚከፋፍሉበት መንገድ የአካባቢነት የባህልና የትግሬኛ ቋንቋ አነጋገር ዘየ ልዩነትን የሚያጎሉ ስሜቱን በማጠናከር ነው። …በእርግጥ በደምብ ሳንሰራበት የቀረ ክፍተት በተለያዩ ቦታዎች ያሉ የንግግር ዘየ፥ ባህል ምናምን ጥናት አድርገን አንድ የሚያደርጋቸውን ስራዎች ሳይሰራ ነው የቆየው። በሁለቱም የትግራይ ጫፎች የወልቃይት ማንነት ጥያቄ እና የራያም ማንነት ጥያቄ እያነሱብን ያሉት ቀደም ብየ እንደገለፅኩት የበለጠ የመከበብ የመቀርቀር ስሜት እንዲሰማን ነው።”

3) ህወሓት የጥሩነትና መጥፎነት መለያ ነው!

ከላይ በተገለፀው መሰረት ህወሓት እና የትግራይ ሕዝብ አንድና ተመሳሳይ ከመሆናቸው በተጨማሪ ከህወሓት የተለየ የፖለቲካ አቋምና አመለካከት ማራመድ በትግራይ ሕዝብ ላይ ክህደት እንደመፈፀም ይቆጠራል። ለህወሓት ጥሩ የሰራ ለትግራይ ሕዝብ ጥሩ እንደሰራ ይቆጠራል። ህወሓት የማይፈልገውን መጥፎ ነገር የሰራ ደግሞ በትግራይ ሕዝብ ላይ መጥፎ እንደሰራ ይቆጠራል። “ህወሓት የትግራይ ህዝብ ነው። የትግራይ ህዝብ ማለት ደግሞ ህወሓት” ስለሆነ ህወሓትን መቃወም ፀረ-ሕዝብ መሆን ነው። ይህን አስመልክቶ ዶክተር ተክለ ብርሃን ወልደ አረጋይ የሚከተለውን ብለዋል፡-

“…ህወሓት የትግራይ ህዝብ መሆኑን የምታውቀው 750, 000 አባሎት አሉት። እያንዳንዱ አባል አምስት ቤተሰብ ቢኖረው ትግራይ ነው ማለት ነው። ስለዚህ ህወሓትን ስትነቅፍ ራስህን ነቀፍክ ማለት ነው። …ህወሓት ጥሩ ነገር ቢኖረው የራሱ የትግራይ ህዝብ ጥሩነት ነው የሚሆነው። ስለዚህ የህወሓት ጉዳይ የራሱ የትግራይ ህዝብ ጉዳይ ነው። በህወሓት ጥፋትም ጥሩነትም የትግራይ ህዝብ ነው ጉዳይ ነው። ይህ የትግራይ ህዝብ ጉዳይ የራሱ የትግራይ ህዝብ ጉዳይ ነው። ስለዚህ ህወሓትና የትግራይ ህዝብ የተለያዩ ናቸው እያለ የሚዘርባርቅ ብልጥ ሃይል “እረፍ” ሊባል ይገባል።”

4) ህወሓት እና ዴሞክራሲ
ህወሓት ከተመሰረተበት ዕለት አንስቶ የትግራይ ሕዝብ እና ህወሓት አንድ መሆናቸውን፣ አንድነት ማለት ልዩነትን ማጥፋት እንደሆነና ህወሓትን መደገፍ ጥሩነት፣ መቃወም ደግሞ መጥፎነት እንደሆነ ሲያስተምርና ሲተገብር ኖሯል። በዚህ መሰረት ለእያንዳንዱ የህወሓት አባል፤ አንደኛ፡- የትግራይ ሕዝብ ማለት ህወሓት ነው፣ ሁለተኛ፡- አንድነት ማለት ከድርጅቱ የተለየ አቋምና አመለካከት አለማራመድ ነው፣ ሦስተኛ፡- ህወሓትን መደገፍ ጥሩ፣ መቃወም ደግሞ መጥፎነት ነው። እንደ ዶክተር ተክለ ብርሃን ወልደ አረጋይ አገላለፅ፣ 750, 000 የሚሆኑት የህወሓት አባላት በስራቸው የሚያስተዳድሩ አምስት ቤተሰብ ቢኖራቸው የትግራይ ሕዝብ በሙሉ ህወሓት ነው። ስለዚህ ላለፉት አርባ አመታት አብዛኛው የትግራይ ተወላጅ፤ ህወሓት ማለት የትግራይ ሕዝብ እንደሆነ፣ ማንኛውም ዓይነት ልዩነት ፀረ-አንድነት፣ ፀረ-ሕዝብ እና መጥፎ ምግባር እንደሆነ ከሌሎች እየሰማና በራሱም እየተናገረ ያደገ ነው።

በእንዲህ ያለ ማህበራዊ ስነ-ልቦና እና አስተምህሮት ውስጥ ተወልዶ፥ አድጎና ጎልምሶ ዛሬ ላይ የደረሰ ግለሰብ፤ እንዴት ሆኖ ህወሓትን መቃወም፥ መተቸት፥ መንቀፍ ይችላል? በምን አግባብ ራሱን ከህወሓት መነጠል ይችላል? እንዴትስ ከህወሓት ተነጥሎ መልካም ነገር መስራት ይቻለዋል? በዚህ ሁኔታ መቼና እንዴት የትግራይ ሕዝብን ከህወሓት መነጠል ይቻላል? ህወሓትን ከትግራይ ህዝብ ትከሻ ላይ መነጠል ካልተቻለ እንዴት ሆኖ የሕዝቡን ፍላጎትና ምርጫ ማስከበር ይችላል? ፓርቲና ሕዝብን መለያየት ካልተቻለ በምን አግባብ የህወሓት አባላትን ከትግራይ ተወላጆች መለየት ይቻላል? ይህ ሁሉ የሆነው የህወሓት ዓላማና ግብ ከትግራይ ህዝብን ጥቅም ከማረጋገጥ ይልቅ መጠቀሚያ ማድረግ ስለሆነ ነው፡፡ የህወሓት የፖለቲካ አይዲዮሎጂ ከስሩ እስካልተነቀለ ድረስ ትግራይ ውስጥ ዴሞክራሲ ይኖራል ብሎ ማሰብ የቢሆን አለም ቅዠት ነው። ስለዚህ የትግራይ ህዘብ ያለው አማራጭ ህወሓት ወይም ባርነት ነው!!

Advertisements

One thought on “የትግራይ ህዘብ አማራጭ ህወሓት ወይም ባርነት ነው!

  1. የህወኃት አመራሮች የክልሉን ህዝብ አማራጭ አሳጥተዉት ከእኔ ጋር ካልሆናችሁ አማራዉ አሮሞዉ ደቡቡ ወዘተ ያጠፋችኋል በሚል የሀሰት ቅስቄሳና ማስፈራሪያ በማድረግ በብቸኝነት ተቆጣጥረዉት የቆዩ ሲሆን ከዚህ በኋላ ህወኃት ቢበዛ እንደማንኛዉም አማራጭ ድርጅት ከመሆን ዉጪ ለብቻዉ የትግራይ መሪ ድርጅት የሚሆንበት ምክንያት አይኖርም ፤ጊዜዉ አልፎበታልና፡፡እንደ ሰሞኑ አቋማቸዉ ከሆነ ደግሞ ህወኃት በመላዉ የኢትዮጵያ ህዝብ ላይ ጦርነት ያወጀ ወንጀለኛ ድርጅት እንጂ ህጋዊ ድርጅት ሊሆን ስለማይችል በህግ እንዲፈርስ ተደርጎ ወንጀለኞችም እየተጣሩ በቁጥጥር ስር ሊዉሉ ይገባል፡፡
    ለመሆኑ ይሄ ጄነራል ተክለብርሃን የሚባል ሰዉ በየትኛዉ የህዝብ ዉክልናዉ ነዉ የክልሉን ህዝብ በፌደራሉ መንግስት ላይ እየሳመጸ ያለዉ ?ጄነራል ተክልብርሃን ያስተላላፈዉ እያንዳንዱ መልእክት በሽብርተኝነት የሚያስከሰሰዉ በሆነ ነበር፡፡፤እሱና ግብረአበሮቹ ላለፉት 27 ዓመታት በግላጭ የህዝብ ገንዘብ ሲዘርፉና ንጹሃን ዜጎችን ከየመንገዱ እያፈሱ በየአስርቤቱ ያለጥፋታቸዉ ሲያሰቃዩ እንዳልኖሩና የሀገርቱን ለኡላዊነት በተዳጋጋሚ ሲያስፍሩና መሬታችንን ለባእድ ሀገር በገንዘብ ሲሸጡ ህገመግስቱን ተቃዉማችኋል ሳይባሉ ቆይጠዉ ዛሬ በዶ/ር አብይ መርነት ለህዝብ ጥቅም ታስቦ እየተሰራ ባለዉ ስራ “ህገመንግስቱ ተጣሰ” እያሉ ማላዘናቸዉ እጅግ አስተዛዛቢ ነዉ፡፡እነ ተክለብርሃን ከሌሎች የሀገርቱ ክልሎች በተለየ በህገመንግስቱ የተፈቀደዉ መድበለ ፓርቲ ስርአትና የፈለጉትን አመለካካት የማራመድና የመቃወምና የመደራጀት መብት በትግራይ ተግባራዊ እንዳይደረግ ገደብ ማድረጋቸዉ እጅግ አሳዛኝ ሆኖ እያለ ይሄዉ ዛሬም ከስንት ዘመን በኋላም ህወኃት ማለት ትግራይ ህዘብ ነዉ፡፡ሕወኃት ለሰራዉ ወንጀል ሁሉ ዋነኛዉ ተጠያቂዉ ህዝቡ ነዉ የሚል አስገራሚ ነገር እየነገሩን ነዉ፡፡ከዚህ አባባል የምንረዳዉ የትግራይ ህዝብ ምን ያህል ችግር ዉስጥ እንደሚገኝ ነዉ፡፡በጣም አሳፋሪዉ ጉዳይ ደግሞ ይሄ መልእክት የተላለፈዉ በአንድ ከሰልጣን የተባረረ አኩራፊ ጄነራል መሆኑ ነዉ፡፡በዚህ አጋጣሚ የነዚህ ራስ ወዳዶችን አቋም በአደባባይ በማጋለጥ ለህዝብ ተቆርቋሪነታቸዉን በድጋሚ ላረጋጋጡት ጄነራል አበበ (ጆቤ)ያለኝን አድናቆት ሲገልጽ ከታላቅ አክብሮት ጋር ነዉ፡፡
    እነዚህ አኩራፊዎች በሀገርቱ የጀመረዉን ለዉጥ ለምን መቃወም እንዳስፈለጋቸዉ የማይታወቅ ምስጢር አይደለም፡፡ለዓመታት የለመዱት ሁሉን የማግበስበስ አባዜ ስለተጠናወታቸዉ እንጂ እነሱን በተለየ ሊያስኮርፍ የሚችል አንዳችም ችግር ኖሮ አይደለም፡፡ከሌላዉ ክልል ህዝብ እነሱን በተለየ የሚያስኮርፍ አንዳችም ምክንያት በሌለበት ሁኔታ ለዚያዉም ገና በጅምር ያለ የለዉጥ እርምጃ ያን ያህል ለጦርነት የሚጋብዝ ባልሆነ ነበር፡፡ዶክተር አብይ ላይ አሁን አመጽ እያነሳሱ ያሉት ወገኖች ህዝቡን በፍጹም የማይወክሉ መሆናቸዉ ቢታወቅም ከነሱ ጋር በሚደረግ ማለቂያ የሌለዉ አተኳሮ ወርቃማ ጊዜን ላለማባከን በአናቱም ነገሩ ያልገባቸዉ የዋህ የክልሉ ህዝቦች ተወናብደዉ መንግስት ላይ መቀያየም እንዳይኖር ኢትዮጵያን ለጥቅም ካልሆነ እንደሀገር ከማይመለከቱ እንደ ጄነራል ተክለብረሃን ጋር ሳይሆን ሃላፊነት ከሚሰማቸዉ ሌሎች ሀገር ወዳድና ሃቀኛ የክልሉ ምሁራንና ጋር በመወያየት ግልጽነት ለመፍጠር ቢሞከር ተገቢ ይመስለኛል፡፡እነዚያ እያወቁ የሚበጠብጡ አኩራፊዎችን ከዚህ በላይ መታገሱ ተገቢ ባለመሆኑ ጠቅላይ ሚኒስትሩ ህዝብን በሚሳምጹ ግለሰቦች ህጋዊ እርምጃ ሊወሰድባቸዉ ይገባል፡፡እነሱ ካመቻቸዉ ብዙ ነገር ከማድረግ የማይመለሱ በመሆናቸዉ ከሚገባዉ በላይ ትእግስት ማሳየት ከሞኝነት ወይም ከፍርሃት ያስቆጥራልና ህጋዊ እልባት መስጠቱ ተገቢ ይመስለኛል፡፡
    የጦር ጄነራል ሆኖ በመላዉ ሀገርቱ ህዝብ ላይ ጦርነት በይፋ ያወጀዉ ጄነራል ተክለብርሃን ጀምሮ ሌሎች በዝርፊያ፤ በወንጀል የሀገር ሉአላዊነትን በገንዘብ በመሸጥ ህዝብን እርስበርስ በማጋጨት ላይ ሲሳተፉ የቆዩት ላይ ህጋዊ እርምጃ እንዲወሰድ ህዝቡ እየጠየቀ ነዉ፡፡ስለዚህ ጠቅላይ ሚኒስትር አብይ ለራቻዉ ሳይሆን ለኢትዮጵያ ሀዝብ ደህንነት ሲሎ እነዚህ ወንጀለኞችን ለፍርድ ያቅርቡልን፡፡ ዶ/ር አብይ አሁን የሚታየዉን የደህንነት ክፍተት ለመሙላት በተለያዩ ሰበቦች ገለል የተደረጉ ነባርና የተማሩ ጀኔራሎችን ሊጠቀሙባቸዉ ይገባል፡፡ ለምሳሌ እንደጄኔራል አበበ ተክለማርያም ፣ጄነራል አለምእሸት ጄነራል አሳምነዉ ጽጌ ወዘተ .በተረፈ ተክለብርሃንና መሰሎቹ ፈለጉ አልፈለጉ የትግራይ ህዝብ የአንድ ወንጀለኛ ድርጅት አስረኛ የሚሆንበት ምክንያት አይኖርምና ራሱን ነጻ በማዉጣት ከቀረዉ የሀገርቱ ህዝብ ጎን ሊቆም ይገባል፡፡ የዶክተር አብይ የጀመሩት ለዉጥ ጠቀሜታዉ ለሁሉም ህዝቦች እንጂ በተለየ ትግራይን ህዝብ ጥቅም የሚጎዳበት አንዳችም ምክንያት እንደሌለ የትግራይ ህዝብ ሊገነዘብ ይገባል፡፡

    Like

አስተያየቶቹ ተዘግተዋል፡፡