በኦሮሞ ብሄርተኝነት ቤት ውስጥ ሆኖ ኢትዮጵያን የማዳን ዕዳ መሸከም እጅግ ከባድ ነው!

አንድ ቀን ከአንድ ወዳጄ ጋር በስልክ እናወራለን፡፡ ጥሩ ግንዛቤ ያለው ሰው ነው፡፡ ከሃገር አቀፍ እስከ ዓለም አቀፍ ፖለቲካ፣ ታሪክ፣ ርዕዮተ-ዓለማዊ ጭብጦችን ጠብሰቅ አድርጎ የሚረዳ ሰው ነው፡፡አልፎ አልፎ የምንደዋወል ቢሆንም የተደዋወልን ጊዜ ረዥም ሰዓት እናዎራን፤ ከወሬያችን እኔ ብዙ አተርፋለሁ፡፡

ፀሃፊ፦ መስከረም አበራ

አንድ ቀን እንደተለመደው ስናወራ የገደል አፋፍ ላይ የቆመች ስለምትመስለኝ ሃገሬ ያለኝን ስጋት አነሳሁለት፤ “ምን ማድረግ ይሻላል፤ አይናችን ስር ሃገራችን ተና ስትጠፋ እንደዋዛ ልናይ ነውኮ!” አልኩኝ፡፡ “ሃገርሽን ትወጃለሽ አውቃለሁ፤ ግን ሳታውቂው የምትፈሪውን የሃገር መፍረስ የሚያግዝ ነገር እየሰራሽ እንደሆነ አታውቂም፤ ትገርሙኛላችሁ!” አለኝ ትዝብት ባዘለ ድምፅ፡፡ ደነገጥኩ! “እኔ ሃገር እንድትፈርስ? ጠጥተሃል እንዴ?” አልኩኝ፤ “ከጠጣሁ አንድ አመት ከስድስት ወር ሆነኝ” አለኝ በቀልድ፡፡

“ፅሁፎችሽን አነባለሁ፤ አዝናለሁም፤ አብይን “Discredit” በማድረግ ሃገር ለማዳን የምትሰሩ የሚመስላችሁ ነገር ግርም ይለኛል፤ እንዳልናገርሽ የማሰብ ነፃነትሽን መጋፋት ስለሚመስለኝ ነው እያዘንኩ ዝም የምለው” አለኝ፡፡ “አልገባኝም በአይኔ ከማየው ውጭ ያልተደረገ ነገር ፈጥሬ ዶ/ር አብይንም ሆነ ሌላ አካል ወቅሼ አላውቅም፤ ምን እያልከኝ እንደሆነ አልገባኝም” አልኩኝ፡፡

“የውልሽ የምታይውን ነገር ተንተርሰሽ እንደምትፅፊ አውቃለሁ፡፡ ችግሩ ያለው ለምታይው ጥፋት እንች ምክንያት ነው ብለሽ የምታስቢው ነገር ትክክለኛው ምክንያት አለመሆኑ ነው፡፡ አንች የምታስቢው ጥፋቱ ሁሉ የመጣው ከዶ/ር አብይ አስተዳደራዊ ድክመት፣ ችልታ፣ አንዳንዴም የኦሮሞ ብሄርተኝት ዝንባሌ እና አድሎ አድርገሽ ነው፡፡ እውነታው ግን ሌላ ነው፡፡ እኔ በቅርብ የማውቅ ሰው ነኝ፤ የእኔን የነባራዊ ሁኔታ ግምገማ ግንዛቤ ብዙ የምትጠራጠሪ አይመስለኝም፡፡ እውነታው ሌላ ነው፡፡

ብዙ ዝርዝር ነገር አልነግርሽም ግን እመኝኝ አብይ መደገፍ አለበት፤ በአብይ ላይ የምትወረውሩት ድንጋይ እንወዳታለን የምትሏትን ሃገር ከቆመችበት አፋፍ ወደ ገደል ይወረውራል እንጅ ጥቅም የለውም፡፡ እሱ በሁለት ጦር እየተወጋ ያለ ሰው ነው፡፡ እንደዛም ሆኖ ከማናችሁም ያላነሰ ሃገሩን ይወዳል፤ ሲቃ እየተናነቀው ስለ ኢትዮጵያ ብሄርተኝነት ሲናገር የሰማሁት ከአስር አመት በፊት ነው፡፡ የማይሆን ነገር አልነግርሽም ብታምኝኝና ሃገርን ወደ ገደል መግፋቱን ብታቆሚ ጥሩነው አለኝ” እዝን ባለ ድምፅ፡፡

“መንግስት ባለበት ሃገር ህዝብ ሲሞት ስፈናቀል፣ እንዲህ ሲሆን እንዲያ ሲሆን ዝምበይ ነው የምትለኝ” በንዴት ጠየቅኩ፡፡ “እሱስ ቢሆን ኢትዮጵያን ከወደደ ለምን እንዲህ እና እንዲያ ያደርጋል፤ ለምን እንዲህ ብሎ ተናገረ” ብየ የበኩሌን ተከራከርኩ፡፡ ብዙ አስረዳኝ፤ትቂት በጣም ትቂት ለዘብ አልኩ፡፡ “የኔ ዝም ማለት ሃገር የሚያድን ከሆነ ዘላለም ዝም ለማለት ዝግጁ ነኝ” አልኩ፡፡ “ዝም በይ እያልኩ እንዳልሆነ ታውቂያለሽ፤ በመፃፍሽ የምታግዥው ነገር እንዳለ ግልፅ ነው፡፡ መፍትሄው ዝም ማለት ሳይሆን ስትፅፊ ያለውን ነባራዊ ሁኔታ ባገናዘበ መንገድ ይሁን፤ እናንተ ዛሬውኑ ያድርግ የምትሉትን ነገር ማድረግ እየፈለገ የማይችልበት ነገርም እንዳለ ተረጅ፤ ከሁሉም በላይ አብይ የሚያደርገው ማንኛውም እርምጃ ሃገር ለማዳን አንጅ ለማንም ተረኝነት ወይም የበላይነት አይደለም፤ ከኢትዮጵያዊ ለይቶ ሊጎዳው ወይም ሊጠቅመው የሚፈልገው ህዝብ እንደሌለ በተረዳ መንገድ ስህተቶቹን ብትጠቁሚ መፃፍሽ ለምትፈልጊው የኢትዮጵያ ህልውና ያግዛል” ሲለኝ እኔ የማውጠነጥነው “ሃገር ወደ ገደል እየገፋሽ ነው!” የሚለውን አስደንጋጭ ቃል ነበር፡፡

ጠ/ሚ አብይ አህመድ

የሆነ ሆኖ ይህ ወዳጄ ከሚነግረኝ ብዙ ነገር ባሻገር የራሴ ልቦና የሚነግረኝ የዶ/ር አብይ በጎ ጎኖች አሉ፡፡ የመጀመሪያው ኢትዮጵያን መውደዱ ነው፡፡ ሁለተኛው ሰው ሰው የሚለው ማንነቱ ነው፡፡ አብይ ሰው ነው! ሲናደድ ይታወቅበታል፣ያጠፋ ሲመስለው በግልፅ ይቅርታ ይጠይቃል፣ ለመማር ዝግጁ ነው፡፡ ለሃገሩ ይቀናል፤በተለይ የፖለቲካ ባህል ለውጥ ለማምጣት የሚሞክረው ነገር የምደሰትበት ነው፡፡ ሰው ነውና የሚጠፋው ነገርም ይኖራል::

ያላወቅኩለት በኦዴፓ ውስጥ የነበረበትን ፈተና ነው፡፡ ወዳጄ “ብዙ ነገር አልነግርሽም ግን እሱ በሁለት ጦር የሚወጋ ሰው ነው፤ አንዱ ጦር የእናንተ ኢትዮጵያን እንወዳለን የምትሉ ሰዎች ብልሃት ጎደለው ትችት ነው ሌላውን ጊዜው ሲደርስ እነግርሻለሁ” ያለኝ ነገር ዛሬ ገብቶኛል፡፡ አብይ በኦዴፓ ውስጥ የነበረበት ፈተና እኛ ከምንገምተው እጅግ የተለቀ እንደ ነበረ በዚህ ሁለት ቀን ውስጥ ተረድቻሁ፡፡ አቶ ለማ ባፈነገጠበት ሁኔታ ለኦሮሞ ብሄርተኞች ኢትዮጵያን ስለማዳን፣ ስለ ሲቪክ ፖለቲካ ተናግሮ፣ አሳምኖ በሙሉ ድምፅ የህብረ-ብሄራዊ ፓርቲ አባላት አንዲሆኑ ማድረግ ትልቅ ፈተና ነው፡፡ ይህን ማሳካት ቀርቶ መሞከር ከባድ ነው፡፡

በበኩሌ አቶ ለማ የዶ/ር አብይ ቀኝ እጅ ሆኖ የሚሰራ ይመስለኝ ነበር፡፡ በኦዴፓ ውስጥ ያለውን የአክራሪነት ስሜት የሚፋለሙትም አብረው ይመስለኝ ነበር፡፡የለማ አጋርነት ለዶ/ር አብይ ትልቅ ካፒታል እንደሆነ ይሰማኝ ነበር፡፡ ለካ ነገሩ በተቃራኒው ነው፡፡ የለማ ከአብይ የመደመር እሳቤ በተቃራኒው መቆም ለአብይ እረፍት የማይሰጥ ሾተላይ ሆኖ ሳለ ይህን ተቋቁሞ በኦዴፓ ውስጥ ቀርቶ በእኛ ውስጥ የነገሰውን አቶ ለማን በሃሳብ ማሸነፍ ትልቅ ብርታት የሚጠይቅ ነገር ነው፡፡ በበኩሌ በጣም ተገርሜያለሁ….! ጠ/ሚው በአንድ ወቅት “እኛ እውነት ነው የያዝነውና እናሸንፋለን” ያሉት ስሜት የተቀላቀለበት ንግግራቸው ምን ማለት እንደሆነ አሁን ገብቶኛል፡፡ አብይ የሚስቱት ነገር ይኖራል፤ በዛ ከእኔ የበለጠ አብጠርጥሮ የሚተቻቸው የለም፡፡ ይህን ወደፊትም የምቀጥልበት ነገር ነው፡፡

አብይ በኦሮሞ ብሄርተኝነት ቤት ውስጥ ሆኖ ኢትዮጵያን የማዳን እዳ ተሸክመው የከፈሉትን ዋጋ በትልቅ ክብር በልቤ የምይዘው ነገር ነው! ለዚህ ትልቅ አክብሮት አለኝ፤ ምስጋናም ጭምር፡፡ በኦሮሞ ብሄርተኝነት ቤት ሆነው የማይቻለውን ሃገራዊ ራዕይ ለማሳካት መሞከራቸው፤ ሞክረውም የስኬት በር ላይ መድረሳቸው እኔ ብሆን የማልችለው ስለሆነ በብዙ ተገርሜያለሁ፡፡ መንግስት ብቻ ሳይሆን ሃገር ለመሆን እየሞከረው የነበረው የኢህአዴግ ድርጅቶች ውህደት ለሃገሬ መቀጠል ወሳኝ ነገር እንደሆነ አጥብቄ አምናለሁ፤ ይህ ለምን እንደሆነ ከሰሞኑ በማስነብበው አርቲክል እዳስሰዋለሁ፡፡

ከአስቸጋሪው ጋር ተፋልመው ኢትዮጵያን ለማዳን ለሰሩት ሁሉ አብይ መመስገን አለባቸው፤ የመነጠልን ስብከት እምቢ ብለው የአብይን የመደመር መንገድ ለመከተል የወሰኑ የኦዴፓ መኳንንትም መመስገን አለባቸው፡፡

መጭው ዘመን የተሻለ እንዲሆንልን ምኞቴም፣ ፀሎቴም ነው!

7 thoughts on “በኦሮሞ ብሄርተኝነት ቤት ውስጥ ሆኖ ኢትዮጵያን የማዳን ዕዳ መሸከም እጅግ ከባድ ነው!

  1. ከመሪያችን ከአቢይ ጎን በመሆን ኢትጵያን ሐገራችንን ማዳን ይገባናል ። ስለዚህ እኛ ኢትዮጵያኖች ከፍራሽ ብሔርተኞች ስለምንበልጥ እንዲሁም እግዚአብሔር ከእኛ ጋር ሰለሆነ የማታ ማታ ድሉ የእኛ ነው አትጠራጠሩ አሁን ነው ሰዓቱ!!!

    Like

  2. የሰውየነውን ሐሳብ ሙሉ በሙሉ እስማማበታለሑ ዶር. አብይ በኦዴፓ ስብሰባ (ቋንቋውን ባልሰማም) ምን ያክል በነገር እንደተጠበሰ ፊቱ ይናገር ነበር በተለይም ለዚሕ ለውጥ መምጣት አብሮ ከታገሉ እንደ ቀኝ እጅ ከሚቆጠሩ እንደ ለማ ካሉ በኢትዮጲያውያን ልብ በእጂጉ በነገሱ ሰዎች! እንዳው በደፈናው ፈጣሪ ይርዳን ሑሉም ለአገሩ ቅን አሳቢ ያድርግልን::

    Like

  3. መልእክቴ በተለይ ለመምህርት መስከረም አበራ ነው።ይሄንም ከተረዳሽ መልካም ነው።እስካሁን የሄዳችሁበትና በአብይ ላይ የሰበቃችሁይ ጦር ቀላል ባይሆንም ሳይገባችሁ በመሰለኝና በጥርጣሬ ያደረሳችሁበት ቁስል ግን የማይጠፋ ጠባሳ ነው።ከስዩም ብዙ መማር ትችይ ነበር።አንድም ቀን በውይይቱ አብይን እንደእናንተ ሲያራውጠውና ሲያብጠለጥለው ሰምቸ አላውቅም።
    እግዚአብሔር ከፈቀደ በቅርቡ አዋሳ ለመምጣት ሃሳቡ ስላለኝ አገኝሻለሁ እንጫወታለን ብየ ተስፋ አደርጋለሁ።ስለአብይ ብዙ ነገር አጫውትሻለሁ።
    ይህንን ስል ፍፁም ፍቅርና ትህትናን ተላብሸ እንጅ በንዴት አይደለም።ለፍርድ አትቸኩሉ።በኦሮሞ ድርጅቶች ውስጥ ሆኖ ስለኢት/ያዊነት መታገልና መሞት አሁን አሁን ቅዠት በሆነበት ሰዓት ውስጥ ሆኖ የገጠመውን ፈተና ማንም አልተረዳለትም።እስክንድርና አጠቃላይ ባለአደራ የሚባለው ስብስብም እንዳንች ወደቀልቡ ቢመለስ ሀገር ለማዳን የሚደረገውን ትግል ምንኛ ባቀለለለት ነበር።አንዱ ሰይጣን ግን እሱ ሆኗል።እግዚአብሔር አምላክ ወደህሊናቸው ይመልሳቸው።ሀገሬን የተጣባት ህወኃት ሲጠፋ ተቧጭቀው ሊበሏት ያሰፈሰፉ ተጧሪ ጅቦች ሆነዋል።

    Like

  4. ከሁለታቸችሁ ብዙ ነገሮች ወስጃለሁ አብይና እና አቦ ለማ መገረሣ ሀሣባቸው በጣም አልተለያዩም
    ለምሳሌ፦አቶ ለማ ያሉት መጀመሪያ የህዝብ ጥያቄ እንመልስ ማለትም አማራ ብንወስድ ወሠናችን ይመለሥ ቤተክርስቲያን አይቃጠል የብሄረ ጥቃት ይቁም ብሎ የጠየቀ ህዝብ ነው
    ኦሮሚያን ብንስድ ህገመንግስ በወረመኛ ይጻፍ ፊንፊኔ የኦሮሚያ ናት ብሎ የጠየቀ ነው ስለዚህ ይሄን ጥያቄ መልሠን ህዝብ አምኖብን የድረጅት ስም ደግሞ በህዝብ ፍላጎት እንቀይራለን ነው ያሉት።
    አቶ አብይ ።፦እስካሁን የተጨቆነና የተገፋ ህዝብ በኢህአዴግ በሚል ድረጅት ነው ስለዚህ እኔም ጥሩ ብሠራ በድሮው ነው የምያዘው ስለዚህ ለኔ ሥራ አመቺ የሚሆነው ክልል የሚባል ከጠፋ ሁሉም አንድ አስተሣሥብ ይዞ ከተከተሉኝ ኘገ የተሻለች ኢትዮጵያ ትሆናለች ህዝቦችን በሠላም ወጥቶ በሠላም ይገባሉ ሥራ አጥ ይቀንሳል ዘመን ተሻጋሪ ነበልባል እንሆናለን ነው ያሉት ስለዚህ አለመግባባት እጂ ልዩነት የላቸውም ሁለቱም ለሀገረ ይጠቅማል የሚል ነገረ ነው ያቀረቡት ስለዚህ እናንተ ምን አለችሁ ወገኖቼ።

    Like

  5. የሰላም፣ የፍትህ፣ የዴሞክራሲ ጥያቄዎች ይመለሱ ይሆን?! ጥያቄዎች ሲመለሱ ባለአደራውም ይከስማል – መሪውም ሰላም ያገኛል።

    Like

ምላሽ ይስጡ

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

This site uses Akismet to reduce spam. Learn how your comment data is processed.