የሥልጣን ጥም፣ ፖለቲካዊ ሸር፣ ድንፋታ፣ የአመጽ ጥሪ፤ ለአገርም፣ ለሕዝብም አይበጅም‼

ፀሃፊ፦ ያሬድ ሃይለማሪያም

የጅዋር እና የልደቱ ድንፋታ አዘል ውይይት ሰማሁት። ሁለቱም አገርን እና ሕዝብን ሳይሆን ሥልጣንን ኢላማ ያደረጉ ፖለቲከኞች መሆናቸውን በደንብ ያሳዩበት ውይይት ነው። አብይ የሰራቸው እና እየሰራቸው ያሉ ስህተቶች እንዳሉ ሆነው በተቃዋሚው በኩል ነገሮችን በዚህ መልክ ማጦዝ፣ ሕዝብን ለበለጠ እልቂት ማነሳሳት፣ አንዳንድ ኃላፊነት የጎደላቸው እና የተንኮል የፖለቲካ ትንታኔዎች አገሪቱ ለበለጠ ቀውስ ይዳርጋት ይሆናል እንጂ መፍትሔ አያመጣም። ሁለቱም ደጋግመው ለአብይ አስተዳደር የሰጡት ማስጠንቀቂያ እና የሰነዘሩት ዛቻ በውይይታቸው ውስጥ ያነሱዋቸውን አንዳንድ ጠቃሚ ሃሳቦች ሁሉ አድማጭ እንዳያገኙ የሚያደርግ ነው።

ፎቶ (ከግራ ወደ ቀኝ)፦ ጃዋር መሃመድ፥ ግርማ ጉተማ፣ ልደቱ አያሌው

የኢትዮጵያ ሕዝብ የተንኮል ፖለቲካ ታክቶታል። ዛሬ ላለንበት አስጨናቂ ሁኔታ መፍትሔው መደማመጥ፣ የእራስን ego ዋጥ አድርጎ ለሕዝብ እና ለአገር ጥቅም ቅድሚያ መስጠት እና ፖለቲካችንን ከእልህ እና ከስሜት ማጽዳት ነው። የአብይን አስተዳደር ከመስከረም ሰላሳ በኋላ አናውቀውም፤ ሁላችንም እኩል ነን፤ ሕዝቡም፣ መከላከያውም፣ ፖሊሱም አይታዘዝለትም የምትለዋ የሁለቱ ፖለቲከኞች ማስፈራሪያ ሌላ ዙር ግጭት መደገስ እና የውስጥ ትርምስ ይቀሰቅስ ይሆናል እንጂ እነሱም የተመኙትን ሥልጣን አያስገኝም።

አገሪቱ የሥልጣን ጉጉት ባደረባቸው ፖለቲከኞች እርግጫ ወደ ከፋ ሁኔታ ከመሔዷ በፊት አገራዊ የምክክር መድረክ ሊፈጠር ይገባል።